Staff.am-ի թիմն ընդգրկվել է Սիլիկոնյան հովտում մեծ ճանաչում ունեցող UC Berkeley SkyDeck ծրագրի մասնակիցների շարքում՝ ներկայացնելով արհեստական բանականությամբ աշխատող իր HireBee.ai HRTech պրոդուկտը։
Ստարթափը նաև հայտարարել է համաշխարհային շուկա դուրս գալու ծրագրերի մասին։
staff.am-ը թողարկվել է Հայաստանում 2016 թվականի վերջին, 2019 թվականի մարտին ստարթափը բացեց իր ղազախական, ապա Կենտրոնական Ասիայի ներկայացուցչությունները, իսկ 2020թ․ ներկայացավ լիովին նոր պրոդուկտով՝ դիմումների կառավարման և հավաքագրման լիարժեք համակարգով։
«SkyDeck-ը ձեռնարկատիրության և ստարթափների զարգացման եզակի գլոբալ կենտրոն է Կալիֆորնիայի Բերքլի համալսարանում։ Ծրագրի շրջանակներում ստարթափները ձեռք են բերում պրակտիկ մենթորության, անփոխարինելի փորձի հնարավորություն, հասանելիություն են ստանում գիտահետազոտական լավագույն համալսարաններից մեկին և Սիլիկոնյան հովտի բիզնես համայնքի հսկայածավալ ռեսուրսներին՝ ներառյալ ներդրումներ, հետազոտական լաբորատորիաներից օգտվելու և համալսարանում ստարթափի զարգացման վրա աշխատելու հնարավորություն», – նշեց HireBee համահիմնադիր Վահե Ավետիսյանը։
Այս տարի staff.am կարիերայի հարթակը, որն աշխատում է շուրջ 3,000 միջազգային և տեղական ընկերությունների հետ հայտարարեց ևս մեկ պրոդուկտի թողարկման մասին։ HireBee.ai-ը SaaS պրոդուկտ է HR մասնագետների և ռեքրութերների համար, որը խնայում է թեկնածուների որոնման և կառավարման վրա ծախսվող ժամանակի 40%-ը՝ ամբողջությամբ ավտոմատացնելով մեխանիկական գործընթացները և իրականացնելով թեկնածուների սքրինինգ արհեստական բանականության ալգորիթմների միջոցով։
«HR ոլորտում մի շարք խնդիրների լուծման համար արհեստական բանականությունը լայնորեն կիրառություն ունի», – նշեց տեխնիկական գիտությունների թեկնածու, HireBee համահիմնադիր Լուիզա Ավետիսյանը։ «Մեր թիմն արդեն ավելի քան 2 տարի զբաղվում է մեծ տվյալների և մեքենայական ուսուցման ոլորտում սեփական մշակումներով։ SkyDeck նորարարական ծրագրին մասնակցությունը թույլ կտա մեզ լիարժեք իրացնել մեր ներուժն ու հնարավորությունները և արմատապես փոխել ստարթափի զարգացման ընթացքը»։
«HireBee.ai-ն արդեն հաջողությամբ ներդրվում է հայկական և այլ շուկաներում: Շատ ոգևորող է, երբ տեսնում ես, որ ընկերությունները գնահատում են նման համակարգի առավելությունները»,- նշեց HireBee հայկական գրասենյակի տնօրեն Նազելի Բադալյանը։ «Մեր պրոդուկտը եզակի է և ունի բավականին շատ առավելություններ, իսկ Սիլիկոնյան հովտում գլոբալ նորարարական կենտրոնի մասը դառնալու հնարավորությունն այն բոլորովին նոր մակարդակ կտեղափոխի՝ հնարավորություն տալով աշխատել գլոբալ հաճախորդների հետ»։
Ստարթափների համար նախատեսված ծրագիրը մեկնարկել է 2020թ․-ի հոկտեմբերի 26-ին և կտևի 6 ամիս, որից հետո HireBee.ai պրոդուկտը լիովին պատրաստ կլինի գլոբալ շուկա արտահանելու համար։
