Յուրաքանչյուրս էլ ունի սխալներ թույլ տալու իրավունք, սակայն կան սխալներ, որոնք կարող են բացասական ազդեցություն ունենալ բիզնեսի հետագա զարգացման վրա։ Հատկապես, եթե դուք հանդիսանում եք ծրագրի ղեկավար և հաշվետու եք ձեր թիմին։
Այս հոդվածում մենք կխոսենք այն հինգ հիմնական սխալի մասին, որն անում են ծրագրի ղեկավարները։
Սխալ №1. Ծրագրի ղեկավարը միայն տեղեկատվություն է փոխանցում՝ առանց այն վերամշակելու
Իհարկե, ծրագրի ղեկավարը հանդիսանում է իր թիմի և պատվիրատուի միջև կապող օղակ։ Հետևաբար նա պետք է երկու կողմին էլ փոխանցի համապատասխան տեղեկատվությունը։ Սակայն ծրագրի ղեկավարները հաճախակի մոռանում են, որ պետք չէ սահմանափակվել միայն տեղեկատվության փոխանցմամբ։ Նրանք պետք է կարողանան այդ տեղեկատվությունը մշակել, ապա նոր փոխանցել հասցեատերերին։
Ծրագրի ղեկավարը հաճախակի, առանց տեխնիկական կողմերը հասկանալու, փոխանցում է պատվիրատուին ծրագրի մասին տեղեկատվությունը։ Պարզ է, որ պատվիրատուի մոտ ծագում են հարցեր, որոնց պատասխանը վերջինս չգիտի։ Եվ ստացվում է այնպես, որ ծրագրի ղեկավարը հավելյալ պետք է դիմի ծրագրի տեխնիկական թիմին՝ տեղեկատվությունը ճշտելու համար։
Լուծումն հետևյալն է. պետք է ստեղծել երկու երկխոսության պատուհան՝ ներքին՝ թիմի անդամների համար և արտաքին՝ պատվիրատուի համար։ Դրանք կօգնեն քննարկել բոլոր անհասկանալի դրույթները ներսում, ապա նոր ուղարկել ամբողջական ծրագիրը պատվիրատուին։
Սխալ №2. Պատասխանատվության զգացումի բացակայություն
Ծրագրի ղեկավարն այն անձն է, ով համարվում է նախագծի հաջողության ողջ պատասխանատվության կրողը։ Այդ իսկ պատճառով նա պետք է ոչ միայն առաջադրանքներ տա թիմի անդամներին՝ առանց հետևելու դրանց կատարման ընթացքին, այլ վերահսկի ողջ պրոցեսը։
Սխալ №3. Ավելորդ հուզականություն
Ծրագրի ղեկավարն այն մարդն է, որ պետք է վերահսկի թիմի հուզական վիճակը։ Պատահում է, որ պատվիրատուն խիստ է, ներկայացնում է անհնարին թվացող պահանջներ և այլն, իսկ ղեկավարն իր հերթին սկսում է բողոքել թիմին։ Այնինչ՝ պետք է լինի հակառակը, թիմը պետք է չիմանա պատվիրատուի հետ ծագած դժվարությունների մասին։ Ծրագրի ղեկավարը պետք է փորձի ինքնուրույն շտկել բոլոր խնդիրները՝ միևնույն ժամանակ պաշտպանելով թիմի յուրաքանչյուր անդամի շահերը։ Թիմին պետք է փոխանցել միայն դրական տեղեկատվություն, որ չընկնի թիմի պատրաստակամությունը։
Սխալ №4 Վախ
Ծրագրի ղեկավարները սովորաբար վախենում են պատվիրատուներին տեղեկացնել ընթացքում ծագած խնդիրների մասին։ Եվ վերջում, ծրագրիրը չգիտես ինչու ձախողում է։ Պետք է հիշել, որ պատվիրատուն նույնպես անհանգստանում է ծրագրի համար, և պետք չէ վախենալ նրան էլ տեղեկացնել խնդիրների մասին։ Նա կարող է օգնել։
Սխալ №5. Սխալ հաղորդակցության կառուցում
Ծրագրի ղեկավարը հաճախակի չի կարողանում պատվիրատուին ուղղված հարցը ճիշտ ձևակերպել։ Նա պետք է նախապես կանխատեսի իր հարցին պատասխանները և դրանց հնարավոր տարբերակները։
Այսպես կարելի է զգալիորեն խնայել թանկարժեք ժամանակը։
Հիշե՛ք՝ չկան վատ պատվիրատուներ, կա սխալ կառուցած հաղորդակցություն։