Լուսանկարում Թումո Դիլիջանի մենեջեր Տիգրանն է, մարզիչներ Մերին և Սյուզաննան ու բոլորովին վերջերս նրանց միացած Ամալյան:
Տիգրանը Թումոյին է միացել 2019 թվականից։ Ինչպես ինքն է ասում՝ երկար տարիներ ֆինանսական ոլորտում աշխատելուց հետո որոշեց փոխել աշխատանքը և զբաղվել ավելի հանրօգուտ գործով:
«Թումոն ոչ միայն Դիլիջանի, այլ նաև հարակից քաղաքների պատանիների համար է կրթական միջավայր ստեղծել։ Այժմ ունենք ուսանողներ, ովքեր գալիս են անգամ տասնյակ կիլոմետրեր հեռու քաղաքներից՝ Ալավերդիից, Կողբից, Բերդից, Սևանից։ Զգում եմ, թե ինչպես է Թումոյի հանդեպ պատանիների հետաքրքրությունն օրեցօր ավելանում, հատկապես Գավառում ու Բերդում Թումո տուփերի գործարկումից հետո», – ասում է Տիգրանը:
Ինչպես արդեն գիտեք Տուփերում վարժանքներն անցած ուսանողները դասընթացներին մասնակցելու համար ուղևորվելու են Թումո Դիլիջան: