Հոկտեմբերի 21-25-ը Երևանում, Վանաձորում և Գյումրիում կկայանա ճարտարագիտության ոլորտում հայաստանյան ամենամյա գլխավոր իրադարձությունը՝ «Հայաստան – Ինժեներական շաբաթ 2021»-ը:

Արդեն ավանդական դարձած  ամենամյա այս միջոցառումների մեկնարկը կտրվի վաղը՝ ժամը 10:00-ին Արմենիա Մարիոթ հյուրանոցային համալիրի Տիգրան Մեծ սրահում։ Հոկտեմբերի 22-ին միջոցառումները կշարունակվեն Ինժեներական Քաղաքում (Բագրևանդի 21/1) և կմեկնարկեն  ժամը 10։00-ին՝ ցուցահանդեսային հատվածի բացմամբ։ Մասնագիտական քննարկումների ամփոփիչ միջոցառումը կանցկացվի հոկտեմբերի 23-ին ժամը 11։00-ին՝ Վանաձորի տեխնոլոգիական կենտրոնում:

Շաբաթվա առաջին երեք օրերի բազմաֆորմատ միջոցառումների ընթացքում ինժեներները կներկայացնեն իրենց վերջին նվաճումներն ավտոմոբիլային արդյունաբերության, կիսահաղորդչային արդյունաբերության, ավիատիեզերական արդյունաբերության, էլեկտրոնիկայի, բարձր տեխնոլոգիական արտադրության, կենսաբժշկական սարքերի արդյունաբերության, կիբեռանվտանգության, կրթական տեխնոլոգիաների, գիտության և այլ ոլորտներում:

Շաբաթվա 4-րդ և 5-րդ օրերին Վանաձորի և Գյումրու տեխնոլոգիական կենտրոններում կկայանան նաև հետևյալ թեմաներով հեքըթոնների ամփոփիչ «Demo Day»-երը ․

– «Ինժեներական նորարական լուծումներ արդյունաբերության ավանդական ուղղությունների զարգացման համար» (հոկտեմբերի 24,  Վանաձորի տեխնոլոգիական կենտրոն)

– «CreaTech Նորարական գաղափարներ Շիրակի մարզում ստեղծարար ոլորտների զարգացման համար» (հոկտեմբերի 25, Գյումրու տեխնոլոգիական կենտրոն)

Շաբաթվա միջոցառումների օրակարգերին և այլ մանրամասների կարելի է ծանոթանալ այստեղ:

«Հայաստան – Ինժեներական շաբաթ 2021»-ն իրականացվում է ՀՀ բարձր տեխնոլոգիական արդյունաբերության նախարարության, Ինժեներական ասոցիացիայի և «Ձեռնարկությունների ինկուբատոր» հիմնադրամի կողմից։ Գլխավոր գործընկերն է՝ PMI Science-ը, գործընկերները՝ Նեյշընըլ Ինսթրումենթսը (NI), Ինժեներական քաղաքը (EC), Վանաձորի տեխնոլոգիական կենտրոնը (ՎՏԿ), Գյումրու տեխնոլոգիականը կենտրոնը (ԳՏԿ), Սայհաբ Հայաստան կիբեռանվտանգության նախաձեռնությունը (ՍայՀԱԲ), Մայքրոսոֆտ ինովացիոն կենտրոնը (ՄԻԿ), Նորարարական լուծումների և տեխնոլոգիաների կենտրոնի (ԻԼՏԿ), Հայ-հնդկական ՏՀՏ գերազանցության կենտրոնը, ՏՀՏ գործատուների միությունը (ՏՀՏԳՄ) և «ԵՄ-ն` բիզնեսի համար» նախաձեռնությունը։