Դեկտեմբեր, 2021
December 2021
M T W T F S S
 12345
6789101112
13141516171819
20212223242526
2728293031  
ՁԻՀ. Հայտնի են գիտահետազոտական էկոհամակարգի զարգացմանն ուղղված մի շարք ծրագրերի հաղթողները
News 23/11/2021 16:10

Օրերս հայտնի են դարձել «Ձեռնարկությունների ինկուբատոր» հիմնադրամի (ՁԻՀ) կողմից՝ PMI Science-ի աջակցությամբ իրականացվող՝ Հայաստանում գիտահետազոտական էկոհամակարգի զարգացմանն ուղղված մի շարք ծրագրերից երեքի՝ ԵՊՀ «Տվյալների գիտությունը բիզնեսում» մագիստրոսական ծրագրի, Ասպիրանտների աջակցության և Հետազոտական աշխատանքների ֆինանսավորման ծրագրերի 2021թ. հաղթողները: 

Նոյեմբերի 9-ին Ինովացիոն լուծումների և տեխնոլոգիաների կենտրոնում (ISTC) կայացել է ԵՊՀ «Տվյալների գիտությունը բիզնեսում» մագիստրոսական ծրագրի 2021 թվականի ամփոփիչ միջոցառումը։ Դրա շրջանակում ֆինանսավորման համար ընտրված 19 մագիստրոս վկայագիր է ստացել: 

Հանդիսավոր արարողությանը մասնակցում էին ՁԻՀ-ի, PMI Science-ի, ՀՀ ԲՏԱ նախարարության, ԵՊՀ-ի և այլ գործընկեր կառույցների ներկայացուցիչներ: 

Philip Morris International (PMI) ընկերության պրոդուկտների և տեխնոլոգիական պրոցեսների գծով փոխնախագահ Լուկա Ռոսիի խոսքով, Հայաստանը երկիր է, որտեղ ընկերությունը ցանկանում է ներդրում կատարել և նման ծրագրերը շարունակական են լինելու: 

«PMI-ը ներդրումներ է անում այնտեղ, որտեղ տեխնոլոգիաների և գիտության ոլորտներում ներուժ է տեսնում: Հայաստանում առկա է հզոր գիտական և կրթական հիմք, հետազոտական ինստիտուտներ: Մենք աջակցում ենք այդ ամենին՝ ուսանողներին ու ասպիրանտներին կրթաթոշակներ և գիտական խմբերին ֆինանսավորում տրամադրելով»,- նշել է նա:  

Հաջորդ ծրագրի՝ Ասպիրանտների աջակցության ծրագրի հաղթողների հավաստագրերի հանձնման արարողությունը տեղի ունեցավ նոյեմբերի 10-ին՝ PMI Science գիտահետազոտական կենտրոնում: Այս տարի ևս ֆինանսավորման արժանացավ 10 ասպիրանտ: Ծրագրի նպատակն է խոստումնալից գիտնականներին օգնել կենտրոնանալ գիտական աշխատանքների վրա և չմտածել զուգահեռ գումար վաստակելու մասին։

Վերջիններս հնարավորություն կստանան իրենց հետազոտական աշխատանքների մշակման ընթացքում աշխատել միջազգային առաջատար փորձագետների և մենթորների հետ, ինչպես նաև մինչև մեկ տարվա համար ստանալ ֆինանսավորում։

Նշենք, որ վերջին 4 տարիների ընթացքում PMI Science-ի աջակցությամբ ՁԻՀ-ի կողմից ֆինանսավորում է տրամադրվել 40 ասպիրանտների և հայցորդների։ 

«Հետազոտական աշխատանքների ֆինանսավորման» 2021 թվականի ծրագրի ամփոփիչ միջոցառման շրջանակում 10 հետազոտական թիմեր էլ նոյեմբերի 11-ին արժանացան ֆինանսավորման:

«Մեր նպատակն է, որ գիտնականները ոչ միայն ֆինանսավորում ստանան, այլև ստեղծեն ու զարգացնեն այն միջավայրը, որում աշխատում են»,- ընդգծել է «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանը, հավելելով, որ ներկայացված ծրագրերն ընդգրկում են բազմաթիվ ոլորտներ՝ ֆիզիկա, քիմիա, կենսաբանություն, մաթեմատիկա և այլն։ Նրա խոսքով, Philip Morris International ընկերության հետ համատեղ նախաձեռնություններն ունեն ավելի քան 4 տարվա պատմություն և,  հիմք ընդունելով  արդեն իսկ գրանցված դրական արդյունքները, վստահաբար կլինեն շարունակական ու տարեց տարի կընդգրկեն գիտահետազոտական համայնքի առավել լայն շրջանակ։