2024թ․ դեկտեմբերի 18-ին Հայաստանի եվրոպական համալսարանը (ՀԵՀ) Էլեկտրոնային առևտրի և թվային մարքեթինգի ասոցիացիայի (ECDMA) հետ համատեղ կազմակերպել էր «Մարքեթինգի վարպետության ուղիները» ֆորումը ԵՀՀ տարածքում։ Միջոցառմանը գրանցվել էր մոտ 150 մասնակից, որոնցից 100-ը ներկա էին անձամբ՝ ներառյալ ուսանողներ և հրավիրված հյուրեր։ Ֆորումը նպատակ ուներ ոգեշնչել և անհրաժեշտ գործիքներ տրամադրել այն մարդկանց, ովքեր պատրաստվում են մուտք գործել մարքեթինգի ոլորտ։ Այն ընդգրկում էր ամեն ինչ՝ հիմնարար գիտելիքներից մինչև կարիերայի ռազմավարական ուղեցույցներ։

Միջոցառմանը բացման խոսքով հանդես եկավ ՀԵՀ արտաքին կապերի և միջազգայնացման գծով պրոռեկտոր Գոհար Ավետիսյանը՝ մաղթելով ֆորումին արդյունավետ աշխատանք: Վերջինս նշեց, որ այսպիսի ֆորումները ոչ միայն նպաստում են երիտասարդ մասնագետների գիտելիքների հարստացմանն ու ոլորտում առաջին քայլերը կատարելու վստահության ամրապնդմանը, այլև ստեղծում են արժեքավոր հարթակ նոր համագործակցությունների, փորձի փոխանակման և նորարարական գաղափարների ձևավորման համար։

Այնուհետև Էլեկտրոնային առևտրի և թվային մարքեթինգի ասոցիացիայի նախագահ Եվգենի Միշչենկոն «Մարքեթինգի հենասյուները և դրանց դերը բիզնեսի հաջողության մեջ» թեմայով ելույթում ներկայացրեց ոլորտի բազմազանությունը և դրա ընձեռած հնարավորությունները։ Իր փորձի վրա հիմնվելով՝ Եվգենին բացատրեց, թե ինչպես մարքեթինգի բազմազանությունը թույլ է տալիս յուրաքանչյուրին գտնել իր տեղը։ Նա ընդգծեց, որ մարքեթինգը միատարր մասնագիտություն չէ, այլ լայն ոլորտ, որտեղ կարելի է կիրառել ինչպես ստեղծարարություն, այնպես էլ վերլուծական և տեխնիկական հմտություններ։

Եվգենին ներկայացրեց մարքեթինգի փոփոխական բնույթը՝ շեշտելով, որ մարքեթոլոգները պետք է միշտ սովորեն և հարմարվեն իրենց կարիերայի տարբեր փուլերում։ Նա խոսեց նաև մարքեթինգի բարդ երկդիմիության մասին՝ նշելով, որ այն կարող է լինել թե՛ ցինիկ և մանիպուլյատիվ, թե՛ բարոյական, ուստի էթիկական արժեքները վճռորոշ են։ «Մարքեթինգը մարդկանց վրա ազդեցություն գործելու մասին է, և այդ ուժը պահանջում է պատասխանատվություն և էթիկայի հստակ պահպանություն»,- նշեց Եվգենին։ Նրա ելույթը ոչ միայն ներկայացրեց մարքեթինգի զարգացման կառուցվածքային ըմբռնումը, այլ նաև հորդորեց մասնագիտությանը մոտենալ ռազմավարական մտածողությամբ, հարմարվողականությամբ և ազնվությամբ։

Եվգենիին հաջորդեց «Armenia Digital Awards»-ի մարքեթինգի տնօրեն և ՀԵՀ-ի շրջանավարտ Սաթենիկ Ղազարյանը։ Սաթենիկը անկեղծորեն խոսեց իր սխալներից՝ նշելով, որ նյութական գնումն (օրինակ՝ մեքենա գնելը) առաջնահերթ համարելը ինքնակրթությունից վեր դարձավ իր ամենամեծ սխալներից մեկը։ Նա ընդգծեց, որ ձախողումները վերջ չեն, այլ նոր սովորելու և առաջ գնալու հնարավորություն։ «Երբ ընկնում եք, պետք է վեր կենաք, վերակենտրոնանաք և առաջ շարժվեք»,- ասաց Սաթենիկը՝ իր ելույթով լսարանին տրամադրելով գործնական և հուզիչ մոտեցում։

Այնուհետև ելույթ ունեցավ Մարիանա Էդիլյանը՝ «Viva» ընկերության մարդկային ռեսուրսների տնօրենը։ Ներկայացնելով «Կարիերայի հաջողության 5 բաղադրիչները» թեման՝նա ուսանողներին և հյուրերին ներկայացրեց ինքնաճանաչման և նպատակների հստակեցման կարևորությունը։ Մարիանան կիսվեց այնպիսի գործիքներով, ինչպիսիք են «Պոմոդորո տեխնիկան» ժամանակի կառավարման համար և «30 վայրկյանանոց ռեզյումեի սկանավորման թեստը»։ Նրա խորհուրդները, թե ինչպես հարմարեցնել ռեզյումեն, վստահորեն ներկայացնել ձեռքբերումները և նախապատրաստվել հարցազրույցներին, ներշնչեցին մասնակիցներին և ոգեշնչեցին ակտիվ քննարկումներ։

Ֆորումը եզրափակեց հայտնի գործարար և Swaggy Agency-ի ընկերության բիզնես զարգացման գծով ղեկավար Անտոն Վերտը՝ «Ինչպես և ինչու ստեղծել անձնական բրենդ» թեմայով։ Նա ընդգծեց, որ անձնական բրենդն անփոխարինելի է թե՛ փորձառու գործարարների, թե՛ առաջին աշխատանք փնտրող ուսանողների համար։ Անտոնը շեշտեց անկեղծության և հետևողականության կարևորությունը՝ կոչ անելով մասնակիցներին իրենց առցանց ներկայությունը համապատասխանեցնել իրենց մասնագիտական նպատակներին։

Ֆորումը ամբողջական փորձառություն էր, որը ոչ միայն ուսանողներին, այլև ոլորտի սկսնակներին տրամադրեց գործնական գործիքներ և ոգեշնչում՝ իրական աշխարհի մարտահրավերներին պատրաստվելու համար։ Միջոցառման ավարտին Եվգենի Միշչենկոն ընդգծեց, որ նման նախաձեռնություններն առանցքային նշանակություն ունեն ակադեմիական գիտելիքների և ոլորտի պրակտիկայի միջև կամուրջ ստեղծելու համար։