Krisp-ը հայտարարել է, որ գործարկում է նոր հնարավորություն կամ կարգավորում, որն օգտագործում է արհեստական բանականությունը՝ զանգերի ժամանակ օգտատիրոջ առոգանությունը փոխելու համար: Ընկերությունն առաջին հերթին աջակցություն է տրամադրում հնդկական անգլերենի առոգանությունն ամերիկյանի փոխելու համար:
Այս գործառույթը պահպանում է խոսողի ձայնը և փոխում է միայն հնչյունները՝ ամերիկյան շեշտադրումներին համապատասխանելու համար: Գործառույթը, ըստ երևույթին, փորձարկված է, և բետա տարբերակն արդեն հասանելի է հավելվածում: Օգտատերերը կարող են միացնել գործառույթը ցանկացած ժամանակ զանգերի ընթացքում կամ դրանից առաջ:
Ընկերության համահիմնադիր Արտավազդ Մինասյանն ասում է, որ կարգավորման գաղափարը ծագել է իր զրույցներում հանդիպած խնդրից։
«Շատերը չեն հասկանում իմ առոգանությունը, թեև ես լավ եմ խոսում անգլերեն: Մենք կարծում էինք, որ շեշտը փոխելը կարող է օգնել մարդկանց ավելի լավ հասկանալ միմյանց: Երկու տարի առաջ սկսեցինք աշխատել այս ուղղությամբ և այժմ այն թողարկում ենք բետա տարբերակով»:
Մշակված ձայնը, սկայն, բնական չի հնչում, և երբեմն նույնիսկ որոշ բառեր բաց են թողնվում: Ընկերությունից հայտնում են, որ մոդելը ժամանակի ընթացքում կբարելավվի, և հնարավոր անսարքությունները կվերացվեն:
Ընկերությունը պնդում է, որ վերոնշյալ գործառույթը փորձարկվել է ձեռնարկություններին առաջարկվող փաթեթներում և այն օգնել է զգալիորեն մեծացնել վաճառքների ցուցանիշները։
Ընկերությունը որոշել է նախ աշխատել հնդկական առոգանության վրա, քանի որ հնդիկները կազմում են STEM ոլորտներում համաշխարհային աշխատուժի մեծ մասը: Մոդելը վարժեցվել է խոսքի հազարավոր նմուշների վրա, որոնք ընդգրկում են տարբեր առոգանություններ ու բարբառներ՝ օգտատերերի համաձայնությունը ստանալուց հետո:
