Հունիս, 2021
June 2021
M T W T F S S
 123456
78910111213
14151617181920
21222324252627
282930  
National Instruments-ի հայաստանյան գրասենյակն արդեն Ինժեներական քաղաքում է
News 07/09/2018 12:03

Երևանի Ջրվեժ թաղամասում կառուցվելիք «Ինժեներական քաղաք»-ի առաջին բնակիչներն արդեն նշում են իրենց նորամուտը։ Ամերիկյան «National Instruments Corporation»-ի հայաստանյան մասնաճյուղը ՁԻՀ (EIF) բիզնես կենտրոնից տեղափոխվել է այստեղ։ Այս մասին «StartHub»-ը տեղեկացավ ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայությունից։

Գրասենյակի բացման պաշտոնական արարողությունը կայացավ սեպտեմբերի 5-ին։ Միջոցառմանը ներկա էր նաև ՀՀ տրանսպորտի, կապի և տեղեկատվական տեխնոլոգիաների նախարարի առաջին տեղակալ Հակոբ Արշակյանը։

«National Instruments Corporation»-ը հինադրվել է ԱՄՆ Տեխաս նահանգում, գլխամասային գրասենյակը Օսթին քաղաքում է։ Այն համաշխարհային առաջատարներից է չափիչ սարքերի, ավտոմատացված թեստավորման ու կառավարման համակարգերի նախագծման և արտադրության ոլորտում։ Հայաստանյան մասնաճյուղը գործունեությունը սկսել է 2007 թվականին և դարձել մայր ընկերության «Համակարգային ճարտարագիտության կենտրոն» (Systems Engineering center):

Գրանսենյակի բացման կապակցությամբ Հայաստան է ժամանել նաև «National Instruments» (NI) ընկերության տարածաշրջանային գծով փոխնախագահ Ռոբերտ Մորտոնը։

«NI Հայաստանի» գործադիր տնօրեն Արսեն Առուստամյանի ուղեկցությամբ հյուրերը շրջեցին շենքում, ծանոթացան գրասենյակային պայմաններին։ Ընկերության ղեկավարը ներկայացրեց խոշոր նախագծերը, որոնք իրականացվել են հայաստանյան թիմի 10-ից ավելի տարիների գործունեության ընթացքում։ Նրա խոսքով` իրենց մասնագետները զբաղվում են ինժեներական համալիր լուծումների նախատիպերի մշակմամբ և նորարարական մեթոդների հետազոտությամբ։

Ընթացիկ խոշոր նախագծերից են 5G կապի համակարգերի նախատիպերի մշակումը, ինքնավար մեքենաների տարբեր ֆունկցիաների թեստավորումը, IIoT (Արդյունաբերական ինտերնետ իրերի) կիրառումը և այս ուղղությունների համար նախատեսված միկրոսխեմաների թեստավորումը։

Շրջայցից հետո նախարարի տեղակալը, «NI Co.» փոխնախագահն ու «NI Հայաստանի» տնօրենը համատեղ ասուլիս ունեցան։

Հակոբ Արշակյանը, շնորհավորելով կազմակերպության աշխատակիցներին, ընդգծեց միջազգային ընկերությունների դերը հայաստանյան ՏՀՏ և ինժեներական ոլորտի զարգացման գործում։

«Ունենք 3 ուղղություն, որոնք առաջ են տանում բարձր տեխնոլոգիական ինդուստրիան՝ կրթություն և գիտություն, միջազգային ընկերություններ, որոնք իրենց փորձն ու կառավարման մշակույթն են բերում Հայաստան և երրորդը`մեր տեղական ընկերությունները։ Ինժեներական ոլորտում «NI» ընկերության ներկայությունը անգնահատելի է: «National Instruments»-ը ինժեներական պլատֆորմ է ստեղծում, և դրա շուրջ հավաքվում են այն ընկերությունները, որոնք ռեալիզացնում են իրենց գիտելիքները` օգտագործելով այդ պլատֆորմը»,- ասաց Հակոբ Արշակյանը։

Նրա խոսքով` Հայաստանում վերջին 10 տարիների ընթացքում այդպիսի 15-ից ավելի ընկերություններ են ստեղծվել, որոնք զբաղվում են համակարգերի ինտեգրացիայով, այսինքն՝ սարքավորումների, ծրագրային ապահովման և գիտելիքների համադրմամբ ստանում են վերջնական լուծում հաճախորդի համար։

«Մենք պետք է բոլոր նախապայմանները ստեղծենք և նպաստենք, որ միջազգային ընկերությունների ներկայացուցչությունները Հայաստանում ավելանան, միաժամանակ ավելանա նաև նրանց աշխատակիցների թիվը»,- նշեց Հակոբ Արշակյանը։

«NI Հայաստանի» տնօրեն Արսեն Առուստամյանն ամփոփեց անցած 10 տարիների աշխատանքը՝ նշելով, որ, սկսելով ընդամենը 3 ինժեներների հետ, այսօր «NI Հայաստանը» 65 աշխատակից ունի։ «National Instruments» ընկերության մասնակցությամբ Երևանում իրականացվել է այնպիսի խոշոր նախագիծ, ինչպիսին Հայաստանի ազգային պոլիտեխնիկական համալասարանում կառուցված «ANEL»-ն է (Հայկական ազգային ինժեներական լաբորատորիաները)։

Արսեն Առուստամյանը վստահություն հայտնեց, որ տեղափոխությունը, շենքային պայմանների բարելավումը հնարավորություն կտան բարձրացնելու իրենց գործունեության արդյունավետությունն ու ավելի արագ զարգանալու։ Դրան կնպաստեն նոր շենքում ստեղծված լաբորատորիաներն ու առկա սարքավորումները։ Բացի այդ, գրասենյակի տեղափոխությունը ավելի կարագացնի «Ինժեներական քաղաքի» նախագծի իրականացմանը։

«National Instruments»-ի փոխնախագահը նշեց, որ իրենք մեծ կարևորություն են տալիս հայաստանյան գրասենյակին, որովհետև այստեղ հավաքված է պրոֆեսիոնալների թիմ, որն ունակ է լուծելու ինժեներական բարդ խնդիրներ: Նա հույս հայտնեց, որ նոր միջավայրը մեծ քայլ կդառնա հայաստանյան գրասենյակի և առհասարակ ընկերության զարգացման ճանապարհին։