Հոկտեմբերի 24-ին, Hero House-ում տեղի ունեցավ OWASP (Open Web Application Security Project) Armenia-ի ամենամսյա հավաքը, որի ընթացքում քննարկվեցին նոյեմբերի 23-24-ին անցկացվելիք ArmSec կոնֆերանսը և Capture The Flag մրցույթը։
ArmSec կոնֆերանսը միջազգային կիբեր֊անվտանգությանը վերաբերող ամենամյա կոնֆերանս է, որը նախատեսվում է իրականացնել նոյեմբերի 24-ին։ Կոնֆերանսի նպատակներից է տեղեկատվական անվտանգությունով զբաղվող մասնագետների համայնքի ամրապնդումը և կիբեռանվտանգության բնագավառի արդի խնդիրների քննարկումը։ Կոնֆերանսի մասնակիցների թվում են լինելու ոլորտի առաջատար մասնագետներ ինչպես Հայաստանից այնպես էլ արտասահմանից: ArmSec կոնֆերանսի ընթացքում նախատեսվում է անցկացնել մի շարք թեմատիկ զեկույցներ և քննարկումներ, որոնք միտված կլինեն Հայաստանի տեղեկատվական անվտանգության ոլորտում գործնական լուծումներ գտնելուն։
Կոնֆերանսի հիմնական թեմաներն են՝
● Հայաստանի կիբեր-անվտանգության համայքնի անելիքներն ու խնդիրները՝ ուղղված պետական և մասնավոր հատվածի թվային կառավարման (e-gov/gov-tech) բարեփոխումներին,
● Հայաստանում կրիտիկական ենթակառուցվածքների պաշտպանությունը կիբեր֊հարձակումներից,
● Հանրային իրազեկումը տեղեկատվական անվտանգությանը վերաբերող խնդիրներին,
● Կրթական ծրագրերում կիբեր֊անվտանգության ներառումը,
● Կիբեր֊հարձակումների վերաբերյալ տեղեկատվության հանրայնացման խնդիրները,
● Ransomware տիպի հարձակումները հայաստանյան բիզնեսների վրա. պաշտպանության հնարավոր ուղիները և ազդեցությունները,
● APT տեսակի թիրախավորված հարձակումները Հայաստանի պետական և մասնավոր կազմակերպությունների վրա,
● DNSSEC վերաբերող խնդիրները և դրա ներմուծումը Հայաստանում,
● Blockchain համակարգերում տեղեկատվական անվտանգության ռիսկերը:
Կոնֆերանսին նախորդող օրը՝ նոյեմբերի 23-ին կսկսվի Capture the Flag (CTF) մրցույթը, որի նպատակն է կիբեր-անվտանգության վերաբերյալ մարտահրավերների և առաջադրանքների շուրջ միավորել ոլորտի երիտասարդ մասնագետներին։ Երկօրյա միջոցառման ընթացքում 100-ից ավելի մասնակիցներ, լուծելուվ տարբեր բարդություն ունեցող առաջադրանքներ, կհավաքեն միավորներ։ Ամենաշատ միավորներ հավաքած մասնակիցներին կշնորհվեն մրցանակներ։
ArmSec Կոնֆերանսի և Capture the Flag (CTF) մրցույթի կազմակերպիչներն են ArmSec հիմնադրամը, “OWASP” Armenia-ն, Illyuria Security ընկերությունը և SmartGateVC վենչուրային ֆոնդը:
Կազմակերպիչների թիմը բաց է տարբեր ձևաչափերում համագործակցության համար:
ArmSec հիմնադրամի մասին
ArmSec հիմնադրամը իրականցնում է ՏՏ ոլորտի, տեղեկատվական և կիբեր-անվտանգության ոլորտի զարգացմանն ուղղված գործառույթներ, ինչպիսիք են դասընթացների, սեմինարների, գիտաժողովների, կոնֆերանսների անցկացում և այլն:
“OWASP” Armenia Chapterի մասին
“OWASP”-ը կիբեռ անվտանգությամբ զբաղվող մասնագետների ասոցիացիա է, որը բաց է բոլոր անհատների համար ովքեր հետաքրքրված են նշված թեմայով։
https://www.owasp.org/index.php/Armenia
Illyuria Security ընկերության մասին
illuria Security ընկերությունը մասնագիտացած է տեղեկատվական անվտանգույթան ոլորտում ավտոմատացման տեխնոլոգիաների մշակմամբ, ինչպես նաև կիբեր-ռիսկերի բացահայտման և չեզոքացման ծառայությունների մատուցմամբ:
SmartGateVC վենչուրային ֆոնդի մասին
SmartGateVC վենչուրային ֆոնդը ներդրումներ է կատարում նախասաղմնային փուլում գտնվող ստարտափներում: Հիմնական ուղղություններն են արհեստական բանականությունը, կիբեր-անվտանգությունը և իրերի ինտերնետը:
Լուսանկարը՝ միջոցառման ֆեյսբուքյան էջից
