Ապրիլի 22-ին ԱԳ նախարար Զոհրաբ Մնացականյանն այցելեց «Ինժեներական քաղաք»: Նշենք, որ «Ինժեներական քաղաք»-ն ստեղծվել է պետություն-մասնավոր համագործակցության շրջանակում:
Զոհրաբ Մնացականյանը շրջայց կատարեց կենտրոնում, ծանոթացավ «Ինժեներական քաղաքի» կոնցեպտին, այնտեղ գործող ընկերությունների ինժեներական նորագույն լուծումներին ու արտադրանքի մոդելներին: Նախարարին ուղեկցում էին Ձեռնարկությունների ինկուբատոր հիմնադրամի (EIF) տնօրեն Բագրատ Ենգիբարյանը և Ինժեներական ասոցիացիայի նախագահ Արամ Սալաթյանը:
Զրուցակիցները գոհունակությամբ արձանագրեցին, որ ՏՏ ոլորտի զարգացումը հնարավորություն է ընձեռել առավել մեծ ուշադրություն կենտրոնացնելու հայրենական արտադրության վրա: Կարևորվեց ոլորտի դերը ինժեներիայի և գիտության զարգացման համար նպաստավոր նախադրյալների ստեղծման և մեծ պահանջարկ վայելող մասնագետների պատրաստման գործում:
Հայաստանի արտաքին քաղաքական գերատեսչության ղեկավարի խոսքով Հայաստանը Տեղեկատվական և Բարձր տեխնոլոգիաների ոլորոտում դեռ շատ ասելիք ունի: Նախարարն ընդգծեց, որ կառավարության կողմից որդեգրված խելացի զարգացման օրակարգը ՀՀ արտաքին քաղաքականության գերակա առաջնահերթություններից է:
Երկուստեք կարևորվեց միջազգային հարթակներում հայկական արտադրանքը ներկայացնելու հնարավորությունների դիտարկման և նոր շուկաների բացահայտման ուղղությամբ փոխշահավետ համագործակցության խթանման անհրաժեշտությունը:
Նախարարն այցելեց նաև Տիեզերքի, Գիտության և տեխնոլոգիաների թանգարաններ, ինչպես նաև գրառում կատարեց պատվավոր հյուրերի հուշամատյանում: