Doctor Yan հավելվածը նախատեսված է ինչպես պացիենտների, այնպես էլ բժիշկների համար։ Պացիենտներին այն հնարավորություն է տալիս ընտրել բժիշկ՝ հիմնվելով ներկայացված տեղեկատվության և այլ այցելուների իրական կարծիքների վրա, հերթագրվել բժշկի այցելության՝ առանց զանգի և հերթերում սպասելու։ Բժիշկների համար հավելվածն ապահովում է առցանց գրանցումներ, ճկուն և հեշտ օգտագործվող օրացույց, տեսանելիություն հանրության լայն շրջանակներում և հեղինակության առաջխաղացում։
«Մենք գործունեության այն փուլում ենք, երբ ֆինանսավորումը և մասնագիտական խորհրդատվությունը կօգնեն մեզ ռազմավարություն մշակել՝ խթանելով ու արագացնելով հարթակի հետագա զարգացումը: Հաջորդ ամիսներին նախատեսված մեր ծրագիրը ներառում է ինտենսիվ իրազեկման արշավներ ինչպես պացիենտների, այնպես էլ բժիշկների շրջանում, նաև ակտիվ համագործակցության հաստատում հիվանդանոցների և ոլորտի այլ ներկայացուցիչների հետ»,- նշել է ստարտափի համահիմնադիր և տնօրեն Իրինա Ղազարյանը՝ հավելելով, որ Doctor Yan համակարգում այժմ գրանցված են 10 հազարից ավելի պացիենտ և 600 համագործակցող բժիշկ։
Bliink-ը, որը նաև FAST-ի նորարարության վենչուրային ծրագրի՝ InVent-ի շահառուներից է, թույլ է տալիս օգտատերերին կանխարգելել և քչացնել համակարգչով աշխատանքից առաջացած առողջական խնդիրները, ինչպիսիք են՝ աչքերի չորություն, կարմրություն, մեջքի ու պարանոցի շրջանում ցավերը: Օգտագործելով այս հավելվածը օգտատերերը զարգացնում են առողջ աշխատանքային սովորություններ ու դառնում ավելի արդյունավետ։ Bliink-ը անընդհատ ստուգում է օգտատերերի աշխատանքային վարքն ու նրանց ծանուցում ուղարկում՝ հիշեցնելով թարթել աչքերը կամ նստել ճիշտ դիրքով։ Հավելվածը նախատեսված է ինչպես բիզնեսների, այնպես էլ անհատ օգտատերերի համար։
«Ներկայում մենք բանակցություններ ենք վարում տարբեր ընկերությունների հետ, որոնք ցանկանում են Bliink-ը հասանելի դարձնել իրենց աշխատակիցներին: STAN-ից ստացած ֆինանսական ու խորհրդատվական աջակցությունը կծառայեցվի նոր թիրախային օգտատերեր գտնելուն, մարքեթինգային արշավներին ու թիմի ընդլայնմանը: Այն կնպաստի նաև այլ օպերացիոն համակարգերի (macOS և Linux) համար բետա տարբերակի մշակմանը»,-ասել է Bliink-ի համահիմնադիր և տնօրեն Նաիրի Բաղդասարյանը:
Հոկտեմբերի սկզբին կկայանա STAN-ի հաջորդ 11-րդ փիչինգը, որի ժամանակ մասնակից ստարտափերը կներկայացնեն իրենց գաղափարները։
STAN-ը FAST-ի գիտության առևտրայնացման ուղղությամբ իրականացվող կարևոր ծրագրերից է, որը ստեղծվել է 2018 թվականին՝ Հայաստանում ձեռնարկատիրական գործունեությունը խթանելու նպատակով։ Ծրագրի նպատակը սաղմնային փուլում գտնվող գիտական և տեխնոլոգիական հայկական ստարտափերում ներդրումներ կատարելն է։ Նախապատվությունը տալով արհեստական բանականության (ԱԲ) լուծումներ առաջարկող ստարտափերին՝ STAN-ը առաջարկում է ներդրումային հնարավորություններ երեք հիմնական ուղղություններով։
Առաջինը՝ ավանդական հրեշտակային ներդրումներն են նախասաղմնայինից մինչև սաղմնային փուլերում գտնվող, գիտական և տեխնոլոգիական նորարարություններով զբաղվող ստարտափերում։ Երկրորդը՝ կանանց ձեռներեցությունն է, ներդրումներ են իրականացվում կազմավորման վաղ փուլում գտնվող և կանանց կողմից ղեկավարվող ստարտափերում՝ Հայաստանում կանանց ձեռնարկատիրական գործունեությանը խթանելու համար։ Եվ երրորդը՝ Moonshot նախագծեր․ ներդրումներ բարձր ռիսկայնություն/բարձր շահույթ ունեցող նախագծերում, որոնք առաջարկում են գերբարդ և խորը տեխնոլոգիական լուծումներ գլոբալ խնդիրները լուծելու համար:
Ներկայում հրեշտակ ներդրողների ցանցի անդամ է 39 ձեռնարկատեր աշխարհի 7 երկրներից:
